ಜೀವನೊದ ಸಾದಿ ಪತ್ತ್‌ದ್ ರಾಜ್ಯದ ರಾಜಧಾನಿ ಬೆಂಗಳೂರು ಸೇರಿನ ತುಳುವೆರ್ ಲಕ್ಷಾಂತರ ಜನ. ದೂರೊದ ಊರುಡಿತ್ತ್ಂಡಲಾ, ತನ್ನ ಅಪ್ಪೆ ಮಣ್ಣ್ ದ ಪ್ರೀತಿ, ಅಪ್ಪೆ ಬಾಸೆದ ಅಭಿಮಾನ ತುಳುವೆರೆನ ಉಡಲ್ಡ್ ಏಪಲಾ ದಿಂಜಿದ್ ಉಪ್ಪುಂಡು. ಈ ದಿಸೆಟ್, ತುಳುನಾಡ್, ಬಾಸೆ, ಸಾಹಿತ್ಯ, ಸಂಸ್ಕೃತಿ ಬೊಕ್ಕೊ ಸಾಮಾಜಿಕ ರ೦ಗೋದಾ ಬುಲೆಚಿಲ್ – ಬೆಂಗಳೂರುದ ತುಳುವೆರೆಡ ಪರಸ್ಪರ ಸೊವ್ಹರೊಡ್ದ್, ಒಗ್ಗಟ್ಟ್ ಉಂಡುಮಲ್ಪುನ ದೃಷ್ಟಿಡ್, ತುಳುಕೂಟ (ರಿ) ಬೆಂಗಳೂರು 1972ಡೇ ಏಪ್ರಿಲ್ 23 ನಾನಿ ಜನ್ಮೊಗು ಬತ್ತ್ಂಡ್. ಕರಿನ 50 ವರ್ಷೋ ಡ್ದಿಂಚ, ತನ್ನ ಧ್ಯೇಯುದ ಸಾಧನೆಗ್ ಬೋಡಾದ್ ಒಂಜೊಂಜೇ ಪಜ್ಜೆ ದೀವೋಂದುಂಡು.

ಬೆಂಗಳೂರುಡು ಉಂಡಾತಿನ ಸುರುತ ತುಳು ಸಂಘಟನೆ ಉಂದು-ಅಂಚನೇ ಜನೊಕುಲೆನ ಉಡಲ್‌ಗ್ ಮುಟ್ಟುನ ಕೆಲಸ ಮಲ್ತಿನ ಕೀರ್ತಿಲಾ ಈ ಕೂಟೊಗು ಉಂಡು.

ಒಂಜಿ ಕ್ಷಣ ಪಿರ ತಿರ್ಗ್‌ದ್ ತೂನಗ ತುಳು ಕೂಟ ದುಂಬು ಬತ್ತಿ ಸಾದಿಡ್ ಪಜ್ಜೆಲೆನ ಗುರ್ತ ಮೂಡ್‌ದ್‌ನ ದೆರ್ತ್‌ದ್ ತೋಜು೦ಡು.
ಸುರೂತ ಪಜ್ಜೆ ಕಲಾಸೇವೆಡ್ ಪ್ರಾರಂಭ ಆತ್ಂಡ್.

ಬೆಂಗಳೂರು ತುಳುವೆರ್ ಇನಿಕ್ ಲಾ ನೆನಪು ಮಲ್ಲುನ ರೀತೀಡ್ 1972ಟ್ ದಿವ೦ಗತ ವಿಶುಕುಮಾರ್ ರೆನ ಪುದರ್‌ ಪಡೆಯಿನ “ಕೋಟಿ ಚೆನ್ನಯ್ಯ” ನಾಟಕೊ ತುಳುಕೂಟದ ಸುರೂತ ಕಲಾಸೇವೆ. ಅಯಿಡ್ದ್ ಬೊಕ್ಕೊ 1974ಟ್ ಉಳ್ಳಾಲದ ವೀರ ರಾಣಿ ಅಬ್ಬಕ್ಕನ ಕೀರ್ತಿದ ಕತೆನ್ “ರಾಣಿ ಅಬ್ಬಕ್ಕ” ಪನ್ಪಿ ನಾಟಕ ಆದ್, 1980ಡ್‌, “ಒಂಜಿ ಪಾತೆರ ಕೇ೦ಡಿಜರತ್ತಾ?” ಪನ್ಪಿನ ತುಳು ನಾಟಕೊಲೆನ್ ತುಳುವೆರೆನ ಮನಸ್ಸ್ ಗ್ ಮುಟ್ಟುನ ರೀತಿಡ್ ಗೊಬ್ಬ್ ದ್ಂಡ್. ಅಂಚೆನೇ 1981ಟ್ ನಾಟಕ ರಚನೆದ ಸ್ಪರ್ಧೆ ನಡಪಾಯಿನಪಗ, ಶ್ರೀ ಕುದ್ಕಾಡಿ ವಿಶ್ವನಾಥ ರೈಕುಲೆನ ‘ಸಂಕ್ರಾಂತಿ’ ನಾಟಕ ಸುರೂತ ಇನಾಮುನ್ ಪಡೆವೋಂದಂಡ್, ಈ ನಾಟಕೊನು ಮುದ್ರಣ ಮಾಲ್ಪಡು ಬುಡುಗಡೆ ಮಲ್ತ್‌ದೋ, ಉಂದು ಸುರು ಸುರುತ ಪಚ್ಚೆಲು.

ತುಳುವರ್ ಒವ್ವೇ ಕ್ಷೇತ್ರೋಡು ಕೆಲಸ ಮಲ್ತ್ಂಡಲಾ ಅಲ್ಪ ತನ್ನ ಪುದರ್ ಒರಿಪುನ೦ಚಿನ ಕೆಲಸನೇ ಮಲ್ಪುವೆರ್. ಅ೦ಚಿನ ಪ್ರತಿಭಾನ್ವಿತೆರೆನ್ ತುಳುವೆರ್ನ ವರ್ಷೋ “ಬಿಸುಪೊರ್ಬೊ’ ಆಚರಣೆ ಮಲ್ಲುನ ಸ೦ದರ್ಭೋಡು ಲೆಪ್ಪುಡಾದ್, ತಮ್ಮನೊ ಮಲೊ೦ದು೦ಡು. ಸ೦ಗೀತ ರ೦ಗೂಡು ಶ್ರೀವಿ.ಮನೋಹರ್, ಕ್ರೀಡಾ ರ೦ಗೊಡು ಶ್ರೀಆಶಿಷ್ ಬಲ್ಲಾಳ್, ಶ್ರೀ ಸತೀಶ್ ರೈ ಈ ಪುದರುಲು ತಮ್ಮನೊ ಪಡೆಯಿನ ವ್ಯಕ್ತಿಲೆಡ್ ಕೆಲವೆರೆನ ಮತ್ರೋ. ಅಂಚನೇ 7ನೇ ತರಗತಿಡ್ ಬೊಕ್ಕೂ ಎಸ್.ಎಸ್.ಎಲ್.ಸಿ. ಪರೀಕ್ಷೆಡ್ ಹೆಚ್ಚಿನ ಅಂಕ ಪಡೆದ್ ತೇರ್ಗಡೆ ಆಯಿನ ವಿದ್ಯಾರ್ಥಿಲೆನ್‌ಲಾ ಪ್ರತಿವರ್ಷ ತಮ್ಮನೋ ಮಲ್ತ್ ದಿನವು ಪ್ರತಿಭಾ ಪುರಸ್ಕಾರೊದ ಪುದರ್ ಡ್ ಮಾಜ೦ದಿ ಪಚ್ಚೆ,

1981ಟ್ ತುಳುಕೂಟೊ ಯಕ್ಷಗಾನೊ ಮೇಳೋ ಪನ್ಪಿನ ಆಟೊದ ಮೇಳೊನು ಶ್ರೀ ಎಚ್.ಎಲ್.ನಾಗೇಗೌಡೆರೆನ (ಅಪಗದ ಕರ್ನಾಟಕ ಸಂಗೀತ ನಾಟಕ ಅಕಾಡೆಮಿದ ಗುರ್ಕರ್ಲು) ಅಮೃತ ಕೈಟ್ ಉದಿಪನೆ ಮಲ್ಪಾದ್, ಬೆಂಗಳೂರುದ ಮೂಲೆಮೂಲೆಡ್, ಆಟ, ತಾಳಮದ್ದಳೆದ ಕಾರ್ಯಕ್ರಮೊ ನಡಪಾದ್‌೦ಡ್, ತುಳುನಾಡ್ ದ ಪುದರ್ ಪಡೆಯಿನ ಯಕ್ಷಗಾನ ಕಲಾವಿದೆರೆಗ್ ತಮ್ಮನೊ ಮಲ್ತ್ ದ ಪ್ರೋತ್ಸಾಹ ಕೊರಿನವು ಗುರ್ತ ಒರಿದಿನ ಪಜ್ಜೆ.

1975ನೇ ವರ್ಷೋಡು ಬತ್ತಿ ನ ಮಲ್ಲ ಬೊಳ್ಳೋಡು ತುಳುನಾಡ್ ಡ್ ಜನತೆ ಕಷ್ಟೊಡು ಬೂರಿನಪಗ, ಕೂಟೊಡು ನಿಧಿ ಇಜ್ಜಿಂದಾಂಡಾಲ, ಶಕ್ತಿಮೀರ್‌ದ್ ಧನಸಹಾಯ ಕೊರ್ದು, ತುಳುವೆರೆನ ಕಷ್ಟೊಡು ಸಾಯ ಮಲ್ತಿನ, ಸಾಮಾಜಿಕ ಸೇವೆಡ್ ತೋಜಿದ್ ಬರ್ಪಿನ ಪಜ್ಜೆ.

1983ಟ್ ಬೆ೦ಗಳೂರುದ ಚೌಡಯ್ಯ ಸಭಾಗೃಹೊಟು ಅಖಿಲಭಾರತ ತುಳು ಸಮ್ಮೇಳನೊ ನಡೆಪಾಯಿನ ಕೀರ್ತಿ ತುಳುಕೂಟೊದವು. ಈ ಸಮ್ಮೇಳನೊಡು ಗುರ್ಕಾರ್ಮೆ ಶ್ರೀ ಕು.ಶಿ. ಹರಿದಾಸ ಭಟ್ರೇನ ಪಾಲ್ ದೆತೊ೦ದಿನ, ತಮ್ಮನ ಪಡೆಯಿನ ಸಾಹಿತಿಲು, ಸಂಶೋಧಕೆರ್ ತುಳು ಬಾಸೆದ ಸಾಹಿತ್ಯೊದ ಬಾನೊಡು ಮೆನ್ಕುನ – ಶ್ರೀ ಅಮೃತ ಸೋಮೇಶ್ವರ್, ಶ್ರೀ ಮಲ್ಪೆ ಶಂಕರ ನಾರಾಯಣ ಸಾಮಗ, ಶ್ರೀ ಯು.ಪಿ. ಉಪಾಧ್ಯಾಯ, ಶ್ರೀ ಕಯ್ಯಾರ ಕಿಞಣ್ಣರೈ ಡಾ|ಸೂರ್ಯನಾಥ ಕಾಮತ್, ಡಾ| ವಿವೇಕ ರೈ, ಶ್ರೀ ವೆಂಕಟರಾಜ ಪೂಣಿಂಚಿತ್ತಾಯೆರ್ ಪನ್ಪಿನ ಪುದರ್ ದ ನಕ್ಷತ್ರೋಲು, ‘ಪೊರ್ಲು’ ಪನ್ಪಿನ ನೆಂಪು ಸಂಚಿಕೆ, ಬೊಕ್ಕೊ ಮಲ್ಲಮಲ್ಲ ಸಾಹಿತಿಲೆನ ಪುಸ್ತಕ ಬುಡುಗಡೆ, ವಿಚಾರಗೋಷ್ಠಿ ನಡಪಾದ್, ತುಳು ಸಾಹಿತ್ಯೋದ ಬುಲೆ ಚಿಲ್ ಗ್ ಕೂಟೋ ಮಲ್ತಿನ ಈ ಎಲ್ಯ ಪ್ರಯತ್ನ, ತುಳುಕೂಟೋದ ಒ೦ಜಿ ಐತಿಹಾಸಿಕ ಪಜ್ಜೆ.

ತುಳುನಾಡ್ ದ ಮಣ್ಣ್ ದ ಮಗೆ, ತುಳು ಕವಿ, ಸ್ವಾತಂತ್ರ್ಯ ಹೋರಾಟಗಾರೆ ತುಳುಬಾಸೆದ ಪುನರುಜ್ಜೀವನೊಗು ಬೆ೦ದಿನ ಸ್ವರ್ಗ ಸೇರಿನ ಪೊಳಲಿ ಶೀನಪ್ಪ ಹೆಗ್ಡೆರೆನ ನೂದನೇ ಪುಟ್ಟಿನ ಪರ್ಬೊ 1990ಡ್ ಆಚರಣೆ, 1993ಟ್ ಕರ್ನಾಟಕೊಗು ತುಳುವೆರ್ನ ಕೊಡುಗೆ ಪನ್ಪಿ ಕಾರ್ಯಕ್ರಮೊಲು ತುಳು ಕೂಟೋದ ಪೆರ್ಮೆ, ಗೌರವ ಹೆಚ್ಚಿಸವುನ ಕಾರ್ಯಕ್ರಮೊಲು. ತುಳುಕೂಟೊ ನಡತೊಂದು ಬೈದಿನ ಸಾದಿಡ್ ಈ ಪಜ್ಜೆದ ಗುರ್ತ ಮಾಜಂದೆ ಒರಿದ್ಂಡ್.

ಕರ್ನಾಟಕ ಸರ್ಕಾರ ತುಳು ಸಾಹಿತ್ಯ ಅಕಾಡೆಮಿನ್ ಬರ್ಖಾಸ್ತ್ ಮಲ್ಪುನ ನಿಶ್ಚಯ ಮಲ್ಪುನಗ, ಅಯಿತ ವಿರೋಧವಾದ್ ಧರಣಿ ಕುಲ್ಲ್ ದ್, ನಿಯೋಗ ಪತೊಂದು ಪೋದು, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿನ್ ಒರಿತೊ೦ದ್೦ಡ್. ತುಳುಕೂಟ ಬೆ೦ಗಳೂರು. ಅಕಾಡೆಮಿದ ಜತೆಟ್ ಕೆಲವು ವಿಶೇಷ ಕಾರ್ಯಕ್ರಮೊಲೆನ್ ನಡಪಾವೊಂದು ಬೈದ್‌೦ಡ್ ಕೂಟ. 1996ಟ್ ವಿಚಾರಗೋಷ್ಠಿ ವ್ಯವಸ್ಥೆ ಮಲ್ತ್ ದ್, ಶ್ರೀ ಆನ೦ದಕೃಷ್ಣರೆನ ಪ್ರಶಸ್ತಿ ಪಡೆಯಿನ ಕೃತಿ “ಕರಿಯವಜ್ಜೆರೆನ ಕತೆಕುಲು” ಬುಡುಗಡೆ ಮಲ್ತ್ ದ್೦ಡ್ ಕೂಟ. 1997ಟ್ ಆಕಾಡೆಮಿದ ಜತೆಕೂಡ್ ದ್ ” ದಿವಂಗತ ವಿಶುಕುಮಾರ್ ಸಂಸ್ಕರಣೆ” 1999ಡ್ ಪರ್ಬೊಲೆನ್ ಭಾರೀ ಗೌಜಿಡ್, ಪೊರ್ಲುಡ್ ನಡಪಾವೊ೦ದು ಬೈದಿನ ಪೆರ್ಮೆ ಕೂಟೋದ. ಈ ತುಳುಕೂಟೊ ನಡತೊಂದು ಬೈದಿನ ಈ ಪಚ್ಚೆಲು ಖಂಡಿತಾ ಮಾಜ೦ದಿ ಪಜೈಲು.